2 Keunenks 10
01Van Achab woonden der nog seuventeg zeuns in Samaria. Jehu schreef braiven dij e noar Samaria stuurde aan hoge heren van Jizreël en aan oldsten en voogden dij Achab aansteld haar. Hai schreef:
02"Zeuns van joen heer wonen bie joe en ie hebben peerden en striedwoagens, n stad mit muren en woapentuug. Nou, as ie dizze braif kriegen,
03zuik den beste en mainst geschikte zeun van keunenk oet, zet dij op troon van zien voader en wees ter kloar veur te vechten veur joen heer zien hoes."
04Zai werden aldergloependst benaauwd en zeden: "Twij keunenks mozzen al manje minst wezen. Hou zol wie t den redden kinnen?"
05Dij over t pelaais en over stad gingen, oldsten en voogden van keunenk zien zeuns, stuurden Jehu dizze bosschop: "Wie binnen joe onderdoaneg, meneer. Wie zellen ales doun wat ie ons bestellen. Wie zellen gainain keunenk moaken. Ie mouten mor doun wat joe t beste tou liekt."
06Dou stuurde hai veur twijde moal n braif. Doar ston in: "As ie t mit mie holden en doun willen wat ik zeg, sloag den ale zeuns van joen heer kop òf en meld joe mörgen om distied bie mie in Jizreël." t Ging om seuventeg zeuns van keunenk dij grootbrocht werden bie vernoame inwoners van stad.
07Mit dat ze dij braif kregen, werden zeuns van keunenk oppakt en aal seuventeg ombrocht. Heur koppen werden in körven stopt. Dij stuurden ze noar Jehu in Jizreël.
08n Bode kwam hom vertellen: "Koppen van keunenk zien zeuns binnen brocht!" "Leg ze op twij bulten bie ingang van stadspoort," onnaaierde Jehu, "en loat ze doar aan mörgen tou liggen."
09Aanderdoagsmörgens kwam e boeten, ging der bie stoan en zee tegen t volk: "t Is joen schuld nait. Ik heb zulm n komplöt tegen mien heer op taauw zet en hom doodmoakt. Mor wèl het dizzent aalmoal ombrocht?
10 Dou der denk om dat niks van wat de HEER tegen t keunenkshoes van Achab sproken het, nait oetkomt. De HEER dut wat e deur zien knecht Elia zegd het."
11 En Jehu luit aal Achab zien volk dat nog in Jizreël overbleven was, ombrengen. Ook aal zien hoge heren, zien roadgevers en priesters, gainain ontkneep.
12 Dou ging Jehu noar Samaria tou. Onderwegens, dou e deur Bet-Eked kwam doar hedders nkander voak trevven,
13 kwam e keunenk Achazja van Juda zien bruiers tegen. "En wèl bin ie den?" vruig e. "Achazja zien bruiers," zeden ze. "Wie willen op veziede bie zeuns van keunenk en van keunenk zien moeke."
14 "Griep ze leventeg!" raip Jehu. Dat deden ze en ze brochten heur om bie put van Bet-Eked. Ze wazzen mit twijenvatteg man en gainain bleef der over.
15 Doarvandoan ging e wieder en trof Jonadab, Rechab zien zeun, dij hom in muit kwam. Hai zee hom goidag en vruig: "Heb wie t goie mitnkander veur, ie en ik?" "Joa, wis!" zee Jonadab, "haand ter op!" Jehu langde hom haand en luit hom bie zok op woagen kommen.
16 "Rie mit!" zee e, "den kin ie zain hou of k mie inspan veur de HEER zien zoak." Dat zodounde ree Jonadab mit Jehu mit op woagen.
17 Dou Jehu in Samaria aankwam, luit e aalmoal ombrengen dij nog van Achab zien volk overbleven wazzen, totdat hai heur aalmoal oetreud haar, krekt as de HEER deur Elia zegd haar.
18 Jehu raip aal t volk bie nkander en zee: "Achab het Baäl mor zuneg aan vereerd; Jehu zel dat veul beter doun.
19 Loat ale profeten van Baäl hier kommen, aal dij hom dainen en aal zien priesters, der mag gainain aan mekaaiern. Want ik wil n dik ovverfeest veur Baäl holden. Dij der nait bie is, zel t nait overleven!" Dat was Jehu zien lozeghaid om lu dij Baäl dainden om haals te brengen.
20 "Kundeg n haaileg feest òf veur Baäl," zee Jehu. En dat deden ze.
21 Jehu stuurde bosschoppers deur hail Israël hèn en van aal kanten kwammen lu dij Baäl dainden op Samaria òf, der bleef gainain vot. Ze kwammen bie nkander in Baäl zien tempel, dat dij laip aan kop tou vol.
22 Dou gaf Jehu odders aan man dij over priesterklaaier ging: "Geef aan aal veurstanders van Baäl feestklaaier." Hai brochde heur de klaaier.
23 Jehu ging mit Jonadab, Rechab zien zeun, noar tempel van Baäl tou. Hai zee tegen lu doar, dij Baäl vereerden: "Kiek goud rond of ter maank joe gainent zitten dij de HEER dainen. Der maggen hier bloots aanhangers van Baäl wezen!"
24 Jehu en Jonadab gingen in tempel en brochten doar vree-ovvers en brandovvers. Boeten stonden ondertussen tachteg man opsteld, dij Jehu der hènzet haar. Hai gaf heur inzeggen: "Dij ook mor ain lopen let van lu dij k joe in handen geef, zel t mit zien aigen levent bekopen!"
25 Dou Jehu mit t brandovver kloar was, zee e tegen zien pazzipanten en ofsieren: "Vot! Der op òf! Sloag ze dood! Loat gainent lopen!" Ze sluigen Baäl zien aanhangers dood en smeten lieken noar boeten tou. Mit geweld gingen ze in t verstaarkte dail van Baäl zien tempel,
26 sleepten de haailege stainen noar boeten en smeten dij in t vuur.
27 Haailege stain dij veur Baäl opricht was, sluigen ze in groezelementen en tempel van Baäl broken ze òf. Ze muiken der toezies van. Aan dag van vandoag tou is t nog net zo.
28 Zo muik Jehu n èn aan t vereren van Baäl in Israël,
29 mor hai huil nait op mit zundege praktieken van Jerobeam, Nebat zien zeun, dij t volk van Israël tou zunde aanzet haar, want golden beelden van bolkaalver in Betel en Dan luit e op stee stoan.
30 De HEER zee tegen Jehu: "Doe hest goud handeld dastoe doan hest zo as ik wol: doe hest mien plannen mit t keunenkshoes van Achab haildaal oetvoerd. Doarom zellen dien noazoaten aan t vaaierde geslacht tou op troon van Israël zitten."
31 Mor Jehu leefde wetten van de HEER, de God van Israël, nait van haarten noa. Hai huil nait op mit zundege praktieken van Jerobeam, dij t volk van Israël tou zunde aanzet haar.
32 In dij tied begunde de HEER kontrainen van Israël òf te hoalen. Hazaël veroverde op Isrelieten haile gerechteghaid
33 oostkaant Jordaan: hail Gilead, t laand van Gad, Ruben en Manasse, van Aroër aan beek òf aan Arnon tou, en nait allenneg Gilead, mor Basan ook.
34 Geschiedenis van Jehu, zien heldendoaden en aal wat e wieder doan het, t staait aalmoal optaikend in kronieken van keunenks van Israël.
35 Dou Jehu oet tied kwam, wer e begroaven bie zien veurolders in Samaria. Zien zeun Joächaz wer keunenk in zien stee.
36 Achtentwinneg joar haar Jehu van Samaria oet, regaaierd over Israël.
|
